Komisariu Adjuntu Comissão Anti-Corrupção (CAC) ba Asuntu
Edukasaun, Kampanha no Peskiza (EKP) José Neves, Kinta no Sesta (9-10/5),
hala’o vizita servisu iha Distritu Lautem hodi hala’o sosializasaun ba
estudantes no lider komunitariu sira kona-ba esforsu luta hasoru korrupsaun.
Komunikadu imprensa ne’ebe JN-Diário hetan asesu husi CAC
informa katak, sosializasaun ne’e
ho tema ba estudante sira mak
“Honestidade Nu’udar Xavi Ida Atu Hado’ok An Husi Korrupsaun” no ba Lider
Komunitariu mak “Kultura Kombate Korrupsaun Hahu Husi Familia no Suku”.
Sorumutu ba dala-uluk iha Distritu Lautem halao iha Kinta
lorokraik (9/5), iha Eskola Tekinu Profesional Lospalos Vila no iha Sesta dadersan (10/5), kontinua ba lider
komunitariu sira iha Sub-Distritu Iliomar nune’e mos iha Eskola Pre-Sekundaria
João Paulo II.
Sosializasaun ne’e hanesan kontinuasaun programa
konsensializasaun CAC nian iha área prevensaun ba esforsu kombate korrupsaun
iha teritóriu TL .
Komisariu Adjuntu CAC,
Jose Neves, konsidera katak, sorumutu ho lider komunitariu no estudante
sira iha Distritu Lautem, atu habelar informasaun kona ba knar instituisaun CAC
nian atu bele loke entidades hotu-hotu nian neon no horizonte inklui lideres
komunitáriu, edukadores, sosiedade sivil, estudantes hodi evita aan husi
tentasaun korrupsaun.
“Ita nian servisu iha Estadu nian laran tutan ba malu no la
hamrik mesak. Tamba ne’e liu husi sorumutu ne’e bele fo hanoin ba malu atu ita
hotu servisu iha sentral no iha lokal bele fo hanoin ba malu atu evita an husi
pratika korrupsaun,” katak Komisariu Adjuntu CAC José Neves wainhira hasoru
malu ho lider komunitariu sira iha Aula administrador sub-distritu Iliomar,
Sesta (10/5).
“Desentralizasaun
poder atu mai liu husi Munisipiu nune’e tentasaun (ba pratika korrupsaun) sei
boot ba lider lokal sira, nune’e liu husi sorumutu ne’e ita fo hanoin ba malu
atu jere rekursu Estadu ho didiak iha futuru,” katak Adjuntu Neves.
Programa
konsiensializasaun CAC nian iha distritu Lautem ne’e hetan partisipasaun
maksimu ho antusiasmu maka’as husi estudantes no lider komunitariu sira ne’ebe
sei halao durante loron sia (7-14/5) nia laran iha Eskola Teknika Agrikola Don
Bosco Fuiloro, Sub-Distritu Tutuala, Eskola Nino Koni Santana no Eskola Teknina
Vokasional Lospalos Vila, Aula Sub-Distritu Iliomar, Eskola Pre-Sekundaria
Catolica Joao Paulo II Iliomar no sorumutu ikus CAC ho estudantes no lider
komunitariu iha Distritu Lautem termina iha Lautem Vila. JNDiario
Tidak ada komentar:
Posting Komentar