Ho oin hamanasa ki’ik, Francisco da Costa Soares “Borlaco”
tun husi kareta Rava Jez (numeru polisia 20-0829 ), hakat nei-neik ba Tribunal
Distrital Dili (TDD) nia odamatan boot hodi hatudu ninia kooperasaun no obidensia ba justisa.
Tau kalsa hena (tisu) kor metan no faru mutin kotak-kotak,
Secretario Estadu Fortalesimentu Institusional (SEFI) ne’ebe Parlamentu
Nasional hasai ona nia imunidade ne’e, marka prezensa iha Tribunal hodi hatan
ba akuzasaun Ministeriu Publiku nian kona ba kazu abuzu poder ho fraudia
fiskal.
Iha primeira julgamentu, Tersa (28/5), ne’ebe hala’o iha
Tribunal Distrital Dili, Francisco Borlaco ho Mariano Malik, nudar director
kompanha Tiara Suplay Lda, tenke neon boot asume kargu foun hanesan arguidu,
tanba deskunfia involve halo abuzu poder no fraudia fiskal.
Prezensa arguidu Francisco da Costa Soares “Borlaco” nian iha Tribunal hetan simpatia husi ninia
companheiro da luta nain hitu (7) husi
Partido Democratico (PD), inklui fundador PD Paulo Asis Belo, eis membru PN Leandro Isaac no mos Prezidenti
Partido Republikano (PR), João Mariano Saldanha.
Borlaco nia maluk no companheiro da luta hirak ne’e,
hakbesik ba kaer liman ho Borlaco hodi fo suporta moral no aten-brani atu
infrenta situasaun defisil ida ne’e.
Primeira audensia julgamentu ba Francisco da Costa Soares
“Borlaco” ne’e ejekuta husi Juiz kolektivu Jacinta Coreia, Julio Gantes, ho
Antonio Helder do Carmo, no Ministeriu Publiku reprezenta husi Prokurador
Internasional, Gloria Alves.
Tuir akuzasaun MP nian ne’ebe lee sai husi Prokurador Gloria
Alves iha audensia julgamentu ne’e katak, iha loron 29 Agusto 2009, arguidu
Francisco Borlaco aprova karta hodi sosa kareta kamioneta tolu ba Ministeriu
Edukasaun atu fasilita programa merenda eskolar.
Aprovasaun ne’e halo, bazeia ba proposta husi Ministeriu
Edukasaun ba Diresaun Nasional Servisu Aprovizionamentu Ministeriu Finansas,
hodi husu osan ho valor US$ 90.000,00 atu sosa kareta kamioneta tolu ba
Ministeriu Edukasaun.
Husi valor orsamentu
ne’e Ministeriu Edukasaun desidi atu sosa kareta kamioneta ida ho montante US$
29.000,00 resin, maibe rezultadu hatudu oinseluk, katak invoice ne’ebé kompanha
Sinarias Lda haruka ba Ministeriu Edukasaun ho montante
Rp.150.000.000/kamionete ne’ebe simplifika ba osan Dolar provolta US$ 16,304,00,00. Signifika, kareta
folin ne’ebé Ministeriu Edukasaun sosa la tuir montante iha prosesu tender.
Ho prosesu tender no ejekusaun projetu kareta tolu ba ME
ne’e nia rezultadu mak MP akuza arguidu
Francisco Borlaco hanesan autor material ba krime abuzu de poder no arguidu
Mariano Malik nudar autor ba krime fraudia fiskal ne’ebe previstu iha artigu
314 kodigu prosesu penal Timor Leste.
Hafoin rona tiha akuzasaun ne’e, Fransisco Borlaco liu husi
deklarasaun ba Tribunal hateten,
proposta sosa kareta mai husi Ministeriu Edukasaun no parte
aprovizionamentu fasilita deit loke tenderizasaun ne’ebe nia prosesu selesaun
kompostu husi ema nain tolu mai husi Ministeriu Financas no nain ida husi
Ministeriu Edukasaun.
Nudar Director Aprovizionamnetu Nasional iha Ministeriu
Finansas, Francisco Borlaco rona deit esplikasaun no simu breafing husi ekipa juri ba tenderizasaun. Katak
priense kriterius nia aprova laos atu estuda tan proposta kompania nian, tanba
nia fo konfiansa tomak ba ekipa avaliasaun mak halo selesaun ba prosesu tender.
Atu dehan deit katak, buat hotu los ona, maka Francisco Borlaco hein aprova no
asina deit.
Borlaco saran tan dehan, tuir ekipa avalhasaun katak kareta
kamioneta ida ho folin US$ 29.250,00 i nia simu deit relatoriu husi ekipa
avalhasaun.
Kareta kamioneta rua ne’ebe hatama husi kompanha Sinarias
husi Atamabua katak, kareta kamioneta ida ho valor Rp.150.000.000 la iha husi
Borlaco no la tuir ona sistema tenderizasaun ne’ebe ekipa avalhasaun halo
selesaun.
Iha fatin hanesan arguidu Mariano Malik, deklara ba Tribunal
katak, nia hatama kareta kameoneta tolu ho marka Mitsubishi Cold tuir pedido
kontratu ne’ebe sira halo ho Governu.
Mariano Malik konfesa mos katak, nia asina kontratu ho
Governu antes kareta tolu ne’e mai iha Timor, no kareta tolu ne’e rasik to’o
iha Timor iha Abril 2009.
‘’Kareta ne’ebe hau simu iha Dili husi kompanha Sinarias Lda
nia folin US$ 27.50/kareta, no invoice ba Ministeriu Edukasaun dehan kada
kameoneta folin Rp 150.000.000 ne’e laos invoice, maibe ne’e hanesan PBB, no
husi kareta tolu ne’e kada kareta hau hetan US$ 2.000.00 liu,’’ deklara Mariano
Malik.
Iha julgamentu ne’e arguidu Francisco Borlaco hetan
asistensia legal husi Defensor Publiku Cancio Xavier no mos Defensor Publiku
internasionl Andre Girotu.
Arguidu Mariano Malik
hetan defeza husi advogadu privadu Afonso Gomes, no julgamentu ne’e adia hikas
ba Kuarta ohin (29/5), hodi rona tan testamunha balun.
Arguidu Francisco Borlaco, esklarese ba jornalista sira
hafoin primeira audensia julgamentu ne’e katak, hanesan ukun nain nia tenke ba
hatan iha Tribunal ba kestaun saida deit ne’ebe mak akuza hasori nia.
“Tribunal mak fatin tesi lia los, no hau nudar ukun nain,
hau tenke hakruk no respeita ba lei,” afirma Francisco Borlaco.
Francisco Borlaco deklara katak, nia prontu nafatin atu tuir
prosesu hotu, no prontu simu desizaun husi Tribunal, tanba ne’e hola parte mos
husi konsekuensia kaer ukun ka sai ukun nain. JNDiario
Tidak ada komentar:
Posting Komentar