Konaba Pedidu Lúcia Lobato, Tribunal Haruka Notifikasaun Ba HNGV

Tribunal Distrital Dili (TDD), Kinta (23/5), haruka karta  notifikasaun ba iha Hospital Nacional Guido Valadares (HNGV) hodi konfirma kondisaun saude prizioneira Lúcia  Maria Brandão Freitas Lobato nian.

       Karta notifikasaun Tribunal nian ne’e mos atu husu justifikasaun HNGV nian sobre ekipamentu saude ne’ebe Lúcia  Lobato konsidera mukit tebes. Nune’e, Lúcia  Lobato husu atu bele autoriza nia halo tratamentu saude iha Hospital Mounth Elizabeth Singapura.

       Advogadu Lúcia  Lobato nian, José Pedro Camões, Sesta (24/5), informa katak, notifikasaun Tribunal nian ne’e atu husu mos ba HNGV konaba kondisaun ekipamentus  ne’ebe tuir Lúcia  Lobato, la permite  atu halo operasaun ba nia-an.

       Informasaun ne’ebe mak José Pedro Camões rona katak, autoridade HNGV seidauk fo resposta ba notifikasaun Tribunal nian ne’e ho razaun ne’ebe seidauk klaru.

       José Camões espera katak, notifikasaun Tribunal nian ne’e bele fó pasu pozitivu atu autoriza Lúcia  Lobato ba halo tratamentu iha rai liur, tanba Lúcia  Lobato presiza duni atu halo operasaun iha Hospital Mounth Elizabeth Singapura.

Antes ne’e, Lúcia  Lobato esklarese katak, nia lakohi halo operasaun iha HNGV no hakarak atu ba halo operasaun iha Singapura ne’e la’os dehan atu sai ba rai liur, maibé tanba  kondisaun HNVG  mak la permiti atu halo operasaun.

‘’Ita hotu hatene katak, ekipamentus iha HNGV ne’e sufisiente tebes, aimoruk mos la iha, iha fulan hirak ne’e ita rona HNGV la iha kondisaun ne’ebe diak, tanba ne’e mak ha’u lakohi atu halo operasaun iha HNGV,” hateten Lúcia  Lobato.

Lúcia  informa mos  katak, nia mos halo ona kontaktu ho mediku sira ne’ebe uluk halo operasaun ba nia iha Singapura atu bele konfirma ho mediku Timor nian, atu bele aprezenta dadus analiza mediku nian konaba moras ne’ebe afeta ba nia.

       Lúcia  esklarese katak, mesmu nia estatutu nudar prizioneira ilegal, maibe nia hein nafatin desizaun husi Tribunal atu bele autoriza nia ba halo tratamentu iha Singapura.

       Iha tinan 2010, Lúcia  Lobato halo ona operasaun dala rua iha Hospital Mounth Elizabeth Singapura, konaba moras ne’ebe afeta ba nia saude, no tuir lolos fulan-fulan Lúcia  Lobato tenke ba kontrola mediku iha Singapura, maibe to’o tinan ida ona nia nunka sama ain iha Singapura tanba tenke kumpri no obdese ba desizaun habeas corpus (tahanan ilegal) husi Tribunal.JNDiario