Vice Primeiru Ministru, Fernando La Sama de Araujo hateten
katak, hela tan tinan lima (5) ka nen (6) nune’e, Chefe Estado Maior
Falintil-Forsa Defeza Timor-Leste (F-FDTL), Maijor Jeneral Lere Anan Timur ho
Brigadeiro Jeneral Filomeno Paixão sei reforma. Tanba ne’e F-FDTL foin sae sira tenki prepara án atu
troka fali fatin no kargu hirak importante ne’e.
“Ha’u hakarak husik hela mensagem ba kuadrus superiores sira
katak, ita nia Chefe Estado F-FDTL, Maijor Jeneral Lere Anan Timur, ha’u hanoin
tinan 5 ka 6 tan nia tenki reforma nune’e mos ita nia Brigadeiro Jeneral
Filomeno Paixão, to’o tinan 60 ba leten labele ona atu kaer nafatin komando.
Ha’u soe liafuan ne’e atu imi hotu sente katak responsabilidade ne’e tenke la’o
hanesan ne’e to’o iha tempu ida maun sira tenke reforma foinsa’e sira tenke
sa’e ba ukun fatin sira ne’e,”hateten La Sama, bainhira partisipa iha serimonia
solene abertura ano lectivo 2013-2014 do Instituto de Defeza nasional (IDN),
Kuarta (29/05) iha Kuartel Jeral Fatuhada Dili.
Tanba ida ne’e La Sama hanoin katak, IDN ne’e importante
tebes atu aprende husi nasaun sira seluk hodi servi nasaun ne’e, sente katak
povu Timor-Leste orgullu ho F-FDTL tanba hahu ona halo buat barak iha nasaun.
Vice PM ne’e mos fo nia hanoin katak, entermus komando
operasional sempre iha nivel ida Kapitaun ba Maijor sira dezempenha papel ida
ne’ebe importante teb-tebes, kuadrus supriores tenke hatene politika militar
atu nune’e bele hola desizoens ba futuru, ka hola desizaun nebe mak rigorozu
iha tempu ne’ebe oportunu.
“Ita nia povu TL hotu nune’e mos ita nia nasaun vizinhu sira
hein hela katak tinan lima ka sanulu tan forsa sira iha F-FDTL husi soldadu
simples to’o iha koronel, ema sira ne’ebe professional, povu TL hein katak aban
bain rua bele sai fatin ida ne’ebe hanesan hatudu dadauk ona ita nia eis Chefe
Estado maior F-FDTL, maijor jeneral Taur Matan Ruak ne’ebe okupa
responsabilidade hanesan Prezidente Republika RDTL ne’ebe hetan orgulhu boot
husi povu TL,” tenik La Sama.
IDN Sei Forma Kuadrus Diak Ba Futuru
Alende ne’e, Vice Primeiru Ministru Fernando La Sama de
Araujo hateten, Instituto Defeza Nasional (IDN) sei forma kuadrus ida ne’ebe
mak diak iha Futuru.
“Kuadrus sira ne’e la’os deit hanoin deit ba militar ida
antigo nian hanesan ninia konhesementu kona ba funu maibe militar ida tempu
agora nian militar nebe mak tenke iha konhesementu luan no relevante liu ho
nesedidades nebe mak atu asegura defeza ba nasaun no mos garante estabilidade
internal rai nian no kontribui boot liu ba dezenvolvimentu nasaional,”hateten
La Sama.
Serimonia solene de abertura do ano lectivo 2013-2014 do
Instituto de Defeza nasional (IDN) ho tema “ A Força Armadas e o
Desenvolvimento Descentralizasão e Poder Local”.
Iha fatin hanesan, Direktor IDN, Pedro Klamar Fuik, hateten
katak, IDN ne’e forma iha tinan 2010, no komesa prepara kondisaun hot-hotu
ne’ebe nesesario liu-liu iha parte estrutural, planeamentu no aktividade ne’ebe
mak nesesariu atu nune’e bele hala’o nia misaun.
Iha tinan 2013 ne’e hanoin katak oportunidade teb-tebes ona
ba IDN atu promove primeiru kursu promosaun ofisial superior. kursu ne’e hahu
kedas iha fulan kotuk no komesa ho area inisial ida mak formasaun intensivo ba
lian portugues. depois fulan oin kursu ne’e termina komesa kedas ho area ba
administrasaun Militar, Area Estado Maior, Area Estratejiku depois konklui ho area foun ida ne’ebe mak
dezenha no bele dehan IDN nian rasik maka area responsabilidade sosial, area
sira ne’e mak fundamental teb-tebes katak oinsa bele valoriza ofisial ida kuandu
iha postu Capitão, Primeiru Tenente atu promove ba Maijor, Capitão Tenente sai
hanesan ofisial superior sira.
“Oras ne’e dadauk ami iha alunus militares hamutuk nain 9
kompostu husi nain ida husi Componente Naval balun husi Componente Terestre no
Kuartel Jeneral F-FDTL, kuandu sira termina tiha i depois se integra alunus
nain lima tan husi Funsionario SED nian, kona ba PNTL, IDN iha misaun hotu para atu valoriza ofesias
PNTL nian mas para atu desenvolve kursu ida hanesan kursu de promosaun ofisial
superior ba PNTL naturamente komando Jeral PNTL nian sei tama iha kontaktu
hirarkia politika nune’e mos ho diresaun defeza nasional nian para atu bele
dezempenha ba kursu nebe IDN prepara dadauk ne’e,” esplika Direktor IDN ne’e.
“Ha’u hanoin
inportante teb-tebes halo formasaun klean liu tan ba Capitão sira nebe mak
promove ba maijor, hanesan ita hot-hotu hatene katak pozisaun ida Capitão ho
Maijor ne’e maka jeralmente kaer buat ida ita bolu Operasaun,” haktuir Pedro
Klamar Fuik.
Seremonia ne’e hahu ho Hino Nasional Timor-Leste nebe hananu
husi grupu Auxiliadora, no minutu de silensio diriji husi Sekretario Estado
Defeza, Julio Tomas Pinto.
Partisipa iha Serimonia ne’e mak, Vice PM, Fernando La Sama
de Araujo, membru Parlamentu Nasional Presidenti Komisaun B, Maria Lourdes
Bessa, Presidenti Komisaun Funsaun Publiku (KFP), Liborio Pereira, Sekretario
do Estado Kombatentes no Libertasaun, Julio Sarmento “Meta Malik”, Ministra
Solidariedade Sosial (MSS), Isabel Guterres, Adjuntu Prokuradoria Jeral da
Republika (PJR), Zelia Trindade, Sekretario do Estado Komunikasaun Sosial,
Nelio Isaac Sarmento, Presidente Tribunal Rekursu (TR), Claudio Ximenes,
Segundu Komandante Jeral PNTL, Komisario Afonso de Jesus.JNDIario
Tidak ada komentar:
Posting Komentar