La’en Kaer Toman Fen Ho Mane Seluk

Lala’ok uma kain Egidio Viegas ho Yuliana Doni nian tenke lekar to’o polisia no Ministeriu Publiku (MP), tanba Egidio la aguenta ho hahalok Yuliana nian ne’ebe konsiente “domin soko laran” ho fali mane seluk.

Iha loron 4 fulan Abril 2011, Egidio atu “oho” sala-sala Yuliana, tanba kaer toman Yuliana ho fali mane seluk iha Yuliana nia kolega nia kost iha Tasi Tolu.

Iha loron ne’ebá, Egidio la hanoin barak. Nia rasta kedas Yuliana mai sira nia uma hodi baku, tuku, tebe no buti iha kakorok. Sorte, membru polisia ida ne’ebe hela besik Egidio ho Yuliana mak ba salva fali Yuliana.

Iha fali fulan Novembru 2011, Egidio fila halo tan asaun fizika hodi baku botir mamuk ba Yuliana nia ulun, tanba la’o ho kolega ida. Loron tuir mai, Egidio fo kedas ultimatum ba Yuliana katak, loron ruma nia sei oho, tanba halo moe liu ona Egidio hanesan nia (Yuliana-red) nia la’en kaben.

Ho asaun fizika no ameasas sira ne’e halo Yuliana tauk hodi hato’o kedas keixa ba Polisia atu bele fo protesaun ba Yuliana nia vida no prosesa Egidio tuir lei.

Prosesu ne’e lori tutan ba Ministeriu Publiku (MP) hodi notifika kedas Egidio hanesan arguidu, tanba halo agresaun fizika no komete violensia doméstika no Yuliana notifika hanesan lezada.

Liu husi audensia julgamentu iha Tribunal Distrital Dili (TDD), Segunda (13/5), Egidio deklara ba Tribunal katak, akuzasaun ne’ebe aprezenta husi MP ne’e balun los no balun la tuir faktus ou inventadu.

Julgamentu ne’ebe  lidera husi juiz kolektivu Antoninho Gonçalves, Duarte Tilman no Julio Gantes, ne’e, parte MP ne’ebe reprezenta husi Prokurador Renato Berenahak, hateten, Yuliana hato’o keixa ne’e  ba polisia iha  fulan Novembru 2011, tanba la aguenta ho atetude Egidio nian ne’ebe baku no rasta nia iha estrada publiku.

Egidio rekonhese katak, nia baku duni Yuliana hanesan nia fen kaben iha sira na’in rua nia uma iha Tasi Tolu, tanba kaer toman Yuliana toba ho mane seluk.

Egidio konfesa katak, hanesan la’en kaben triste no “fuan kanek”, tanba Yuliana ne’ebe nia hadomi los, bele subar fali mane seluk.

Egidio dehan, nia nervozu mak basa duni Yuliana dala rua ou dala tolu. Maibe, la’os tuku no tebe hanesan akuzasaun MP nian.

Egidio esklarese katak, iha loron 4 Novembru 2011, nia haree hetan tan Yuliana ho mane ida tula malu ho motor. Nune’e, nia trava duni sira na’in rua iha estrada protokolu Bombeiros, Caicoli, hodi  bolu atensaun ba mane ne’e katak, Yuliana ne’e nia fen kaben no iha ona oan nain rua.

Ho nervozu, Egidio tenta baku mane ne’ebe tula Yuliana ne’e, maibe ema sira akudi lalais kedas. “Hau la baku Yuliana ho botir tanba altura ne’eba ha’u ba diskuti malu ho mane ida ne’ebé tula nia,” esplika Egidio ba Tribunal hodi halos akuzasaun MP nian.

Ministeriu Publiku liu husi akuzasaun husu ba Tribunal atu aplika pena tinan tolu prizaun ba Egidio, tanba prova duni katak komete krime violensia doméstika hasoru Yuliana. Maibe, parte Olga Barreto, nu’udar defeza husi Defensoria Publiku, husu Tribunal atu absolve tanba Egidio baku Yuliana ho razaun ne’ebé klaru katak toman toba ho mane seluk.JNDiario