PM Xanana Triste Justisa Ba Deit Povu Ki’ik

Primeiru Ministru (PM) Kay Rala Xanana Gusmão hateten katak, sente triste justisa iha Timor Leste (TL) ne’e, dala barak la’o deit ba povu ki’ik sira.

“Ha’u foin dadauk ne’e ba to’o iha Gleno ne’eba feto lubuk ida mak hetan komarka tinan 24, tinan 17 no tinan 12, sira hateten mai ha’u justisa sa porkaria ida mak hanesan ne’e, latetu katak iha ami nia vida tomak lor-loron deit simu violénsia no simu todan, ami labele tiha mak ami hodi oho tiha ami nia la’en,” hateten Xefi Governu Kay Rala Xanana Gusmão, ho lian maka’as, wainhira hato’o programa Desentralizasaun Poder Lokál ba Povu distritu Dili, iha Centro Convenções Dili (CCD), Sábadu foin lalais ne’e.

Xanana hateten katak, justisa saida mak hanehan fali povu ki’ik ne’ebé sala laiha. Tanba ne’e Xefi governu ne’e husu ba autores justisa sira atu labele hanoin katak, sira mak iha lei nia leten fali.

Xanana realsa katak, autór justisa sira ne’e labele hanoin atu hamri’ik deit iha ema ne’ebé sala tiha ona nia leten, maibé nu’udar humanu no ema profesional tenki buka atu kontribui ba dignidade humanu iha TL.

“Tanba bainhira la haree lolos ba problema sosiál povu nian, signifika katak premio novel ne’e la’o iha área balun deit”, subliña Xanana.

Xanana akresenta, lei ne’e laiha ema ida atu bo’ot liu no laiha ema ida atu diak liu ida, maibé nu’udar humanu ho ninia frakezas de intendementu lei ne’e rasik.

PM Xanana hatutan katak, preokupasaun tenki maka’as, la’e Timoroan sai fasista liu duke paparazi.

“Justisa ne’e agora polisia, Ministériu Públiku ho KAK mak hadau malu, maibe lahatene justisa ne’e atu la’o oinsa. Dala ruma hakarak dada ida-ida ba ninia fatin tanba interese nasional, maibé problema sosiál sei as nafatin, akresenta Xanana.

“Dala ruma tanba konstituisaun ne’e mak ita labele temi katak justisa la’o la diak, maibé ida ne’e la dehan katak ita la kontra justisa, la respeita tribunál, no instituisaun justisa hotu,”tenik Xanana

Tanba ne’e katak Xanana Gusmão, to’o ohin loron justisa sei iha faillansu barak, ida ne’e hanesan alerta ida ba ema hotu tanba lei barak liu.

Ho ida ne’e, eis lider rezisténsia ne’e husu ba autores justisa iha Timor Leste atu hatur didiak problema sira ne’e hotu hodi haree papél justisa iha rai ida ne’e hodi povu sente katak iha duni justisa.

 “Kuandu ita la bolu atensaun ba malu, ema balu hanoin katak sira iha tiha ona fulan nia leten,”tenik Xanana. JNDiario