Sistema Justisa Diak Presiza Lori Tempu

Prezidente Tribunal de Recurso (TR) Claudio Ximenes, informa katak, atu hadia sistema justisa iha Timor-Leste, liu-liu iha Tribunal Recurso atu bele sai diak liu tan ba povu no nasaun ida ne’e presiza lori tempu.

“Ita agora harii dadauk sistema ida ne’e, buat ida ne’e komplikadu, lori tempo, demora, dala ruma problema mosu, ita tenki haree oinsa maka ita bele lao nafatin ba oin hodi halo tuir sistema ne’e sai diak tan,”dehan Claúdio Ximenes ba Jornalista sira iha Palacio Prezidensial Aitarak Laran Dili, Segunda, (13/5), hafoin remata enkontru ho Prezidente da Repúblika Taur matan Ruak.

Prezidente TR ne’e afirma, hanesan Xefi Estadu nasaun ne’e nian, nia iha poder tomak atu hatene no koñese saida deit mak lao iha nasaun ida ne’e iha parte justisa, politika, ekonómika no dezenvolvimentu nasional sira seluk.

Nia hatutan katak, sistema ne’ebe harii  iha TR ne’e komplikadu tebes presiza lori tempu. Tanba ne’e sistema justisa ne’ebe lao iha Tribunal ne’e oinsa maka bele hadiak lei sira ne’ebe iha no prepara tan rekursu humanus inklui mos halo reformasaun ne’ebe maka Tribunal presiza halo.

Nia hatutan, dala ruma sistema sira ne’e halo ho lalais deit entaun  presiza hadiak tan buat balun iha lei inklui mos iha sistema sira ne’ebe lao.

Husi informasaun ne’e Prezidente TR haktuir katak, laiha rekomendasaun espesial husi Xefi Estadu Taur Matan Ruak konaba informasaun ne’e. maibe enkontru ne’e hanesan parte ida atu prezidente bele akompaña nafatin servisu sira ne’ebe maka Tribunal halo, iha problema ruma karik, iha solusaun ruma atu halo karik no iha projetu ruma atu hadiak tan karik tamba ne’e liu husi enkontru mensal ne’e Prezidente bele akompañia.

“Ne’ebe ha’u kontente teb-tebes tanba sr. Prezidente mos hatudu vontade diak atu akompañia prosesu ne’ebe la’o dadauk iha ne’e no akompaña prosesu hanesan fulan-fulan nian ne’e diak teb-tebes ne’e para ita bele koalia nafatin ho orgaun soberania sira seluk hodi haree tamba harii justisa ne’e laos buat fasil ida,”dehan Prezidente TR.

Nia hatutan, justisa ne’e atu harii ho diak laos husi Tribunal mesak, laos husi Governu mesak no laos mos Parlamentu deit, maibe hotu-hotu hamutuk maka bele harii sistema justisa ida ne’ebe maka forte no bele fo justisa ba ema hotu.JNDiario