Gabinete PR Diskuti Implementasaun Militar Obrigatorio

Gabinete Prezidencia da Republika (PR) realiza seminario ho objetivu atu halo diskusaun hodi halibur informasoens, ideias, vantazen no desvantazen wainhira implementa militar obrigatorio iha Timor Leste (TL).

“Enkontru ida ohin (horseik) ne’e ho diskusaun hamutuk ho veteranus sira, Sosiedade civil sira atu halo diskusaun konaba asuntus ne’ebe Prezidente da Republika foti antes maka servisu nasional ou militar obrigatorio no sidadania civika Patriotika,”dehan Xefi Casa Civil Prezidente da Republika, Fidelis Magalhães ba jornalista sira iha Palacio Prezidensial Aitarak Laran Dili, Tersa (28/5) hafaoin hala’o seminario ho sosiedade Civil, Veteranus no reprezentante husi Instituisaun Falintil Forsa Defeza Timor Leste (F-FDTL) no Polisia Nasional Timor Leste (PNTL).

Iha diskusaun ne’e, Xefi Casa Civil hatutan, Prezidensia Republika liu husi kaza militar informa asuntu konaba sidadania civika patriotika ne’ebe maka mai ho vantazen no desvantazen ne’ebe maka identifika ona.

Vantazen atu implementa militar obrigatorio ho intrepretasaun husi Prezidensial nian ho naran sidadania patriotika. tanba militar obrigatorio ne’e bele eduka joven sira atu sai nasionalizmu liu tan konaba nasaun demokratiku no bele mos haklean koñesimentu joven sira nian iha area oi-oin hanesan area Saude, Edukasaun, Mekaniku, no seluk-seluk tan ne’ebe maka sei implementa.

Nune’e mos konaba desvantazen atu implementa militar obrigatorio maka kustu ka modalidade ba implementasaun, tanba sei iha programa barak konaba militar nian no fo formasaun ba joven sira iha area oi-oin.

Iha fatin hanesan Adjunto Director Organizasaun Não Governamental (ONG) Fundasaun Mahein (FM), João Almeida, hateten katak, pedidu husi Gabinete Prezidensia da Republika nian katak FM atu aprezenta tema ida konaba ameasa no isu ba Timor Leste.

Tamba ne’e Adjuntu Director FM ne’e informa katak tuir rezultadu monitorizasaun FM nian durante ne’e haré katak isu ne’ebe sai tendensia nasional no rejional implika to’o iha violensia domesika ninian hanesan terorizmu, trafiku humanu, peska ilegal.

“Iha rejiaun ninian kazu hanesan terorizmu, droga, trafiku humanu, atakes pirate, peska ilegal. tanba ne’e maka ami hanoin ameasa sira ne’ebe iha rejiaun implika to’o iha estabilidade nasional ninian, liga ba servisu militar obrigatorio,”dehan  João Almeida

Tamba ne’e parte Organizasaun ne’ebe maka durante ne’e halo monitorizasaun ba parte defeza no seguransa nian husu presiza dezenvolve politika defeza nasional hodi haré mos ba ameasa saida maka iha wainhira implementa militar obrigatoriu.

“Entaun ita liga fila fali ho servisu militar obrigatorio ninian bele presiza aplika ka lae tamba ne’e maka iha konkluzaun ami hateten katak ita presiza dezemvolve politika defeza nasional ida, presiza haré mos amesa ne’e saida?,”sujere Adjuntu Director FM ne’e.

 Aliende ne’e mos, nia hateten, liga ba amesa domestika, krime organizadu, empregu, nune’e mos rekursu ne’ebe maka TL uza agora hodi hala’o dezenvolvimentu iha rai laran depende ba fundus petroliferu. tanba ne’e presiza halo estudus ida klean depois maka implementa militar obrigatorio.JNDiario