Lúcia Lobato: Mafia Justisa Iha TR Daet Ba MP

Prizioneira Lúcia Maria Brandão Freitas Lobato, konsidera aktu mafia justisa ne’ebé mosu iha Tribunal Rekursu (TR) komesa da’et to’o ona iha Ministériu Públiku (MP).

Lúcia hateten lia hirak ne’e hodi halo reasaun hasoru desizaun MP nian ne’ebé arkiva tiha ona nia keixa hasoru juiz nasional nain ida, internasional ida ho membru Parlamentu Nasional ida ne’ebé akuza “futu lia” iha prosesu habeas corpus ne’ebé la iha razaun fundamentu.

“Ha’u hakarak hateten katak, agora ne’e mafia justisa la’os iha deit Tribunal, maibe da’et ona ba MP, derepenti deit taka hikas hau nia keixa hasoru juiz internasionais nain rua, nasionais ida ho deputadu ida ne’ebé involve desizaun habeas corpus ne’e,” afirma Lúcia Lobato ba jornalista iha HNGV, Tersa (14/5).

Lúcia Lobato sente hakfodak tanba prosesu ne’ebé nia hatama iha semana rua nia laran deit hetan kedas desizaun husi MP hodi arkiva lalais tiha deit keixa ne’e ho razaun ne’ebé la fundamentu.

“Tuir despaixu husi Adjunta Prokurador Geral Repulbika, Zelia Trindade katak,  provas ne’ebé ami aprezenta ne’e la sufisienti atu halo akuzsaun hasoru juiz sira ne’e no mós deputadu ne’e. Ida ne’e ita bele dehan katak MP tenta salva mafiozu sira ne’ebé tur iha TR,’’ afirma Lúcia Lobato.

Lúcia konsidera MP halo diskriminasaun ba nia, tanba iha keixa ne’e MP rona deit juiz internasional rua, nasional ida no mós deputadu, maibé MP sira la rona juiza Margrida Veloso no mós nia rasik hanesan vítima.

Prezidenti TR Claudio Ximenes, tuir Lúcia Lobato, la rona funsionariu sira iha TR oinsa mak sira fahe prosesu ne’e ba juiz sira i  la rona mós Konsellu Superior Majistratura Judisial (KSMJ) oinsa renova kontratu juiz sira ne’e.

Lúcia Lobato konsidera hahalok MP ne’e hanesan tristeza bo’ot ida ba Timor sira ne’ebé mak buka justisa no bele hamonu kredebilidade TR ho MP nian.

 Tuir Lúcia Lobato, MP fraku halo investigasaun ba keixa ne’e ou MP mak sengaja duni atu taka tiha prosesu ne’e, tanba bainhira prosesu ne’e la’o ba oin sei dada sira hotu ne’ebé involve prosesu foti desizaun habeas corpus.

“Ha’u hanoin katak Timoroan sira hotu tenki kondena hahalok grupo mafiozu sira ne’ebé hakarak sai tiha nain ba ita nia sistema judisial hodi atinji sira nia interese rasik, tanba se ida ne’e mak ita la fokit abut aat no la oho kedas, tribunal ne’e ba oin sei ba hotu rai kuak, tanba grupo mafiozu sira ne’e mak manda tiha sistema judisial Timor nian,’’ hateten Lúcia Lobato.

Lúcia iha email barak konaba juiz iha TR ne’ebé haruka ba malu, maibé tanba MP la bolu juiza Margarida Veloso no mos nia rasik, nune sira labele fó sai ba públiku, tanba durante ne’e sira hein MP bolu no halo investigasaun mak sira foin loke hotu ba Tribunál no ba públiku hotu haree.

Konaba akuzaun husi MP nian hasoru Lúcia Lobato ho krime denunsia kalunioza. Ho hamanasa  Lúcia dehan, nia prontu ba fó deklarasaun iha MP bainhira MP bolu nia.JNDiario