Tratamentu Saude Iha Rai Luir Tenki Razaun Forte

Membru Parlamentu Nasional  husu ba Governu, liu-liu Ministeriu Saude  wainhira foti desizaun  prizioneira Lucia Lobato halao tratamentu saude rai liur tenki  ho razaun nebe forte hodi labele hamosu duvidas

“Povu iha Nasaun ida ne’e klaru ke hakarak desizaun ida ne’ebe mak ema sira ne’ebe mak kaer knar importante iha Nasaun ida ne’e foti tenki ser justu, justu laos deit ba ema ida rua, maibe justisa ne’e tenki ba ema hotu-hotu,”deklara deputada Adozinda Pires husi bankada Frenti-Mudanca ba Jornalista sira Kuarta (15/05) iha Parlamentu Nasional hodi komenta prizioneira Lucia Lobato ne’ebe husu atu halao tratamentu iha rai liur foin allais ne’e.

Tanba ne’e nee nia  husu ba Ministeriu Saude inklui Doutor ne’ebe mak halo atendimentu medika ba eis Ministra Justisa ne’e fo sai ba publiku karik autoriza tratamentu ba rai liur ho razaun ne’ebe mak forti para labele hamosu duvidas.

“Ministeriu saude liu-liu husi nia doutora sira tenki ser fo informasaun ida ke klaru, esklaresimentu ba povu Timor Leste para povu mos iha konfiansa ba ita nia Nasaun ida ne’e katak los, ema hotu-hotu laos deit eis ministra Lucia Lobato mak iha direitu tratamentu saude kuandu moras, maibe sidadaun hotu-hotu,”haklaken deputada Adozinda.
Maibe deputada nee haktuir se karik nesesariu prizioneira Lucia labele halao tratamentu medika iha rai laran, maibe importante mak labele diskrimina prizioneiru sira seluk.

“Sera ke ida ne’e importante, sera ke ida ne’e nesesariu  katak ninia moras ne’e labele halo tratamentu iha rai laran, tanba sidadaun hotu-hotu iha direitu atu hetan tratamentu saude,”koalia Adozinda.

Nune’e mos iha fatin hanesan deputadu Mateus de Jesus husi bankada CNRT haktuir se karik nesesariu atu eis Ministra ne’e halao tratamentu medika iha rai liur laos kestaun, tanba sidadaun hotu-hotu iha direitu hanesan atu hetan tratamentu mediku.

“Labele hateten tanba prizioneiru, tanba sidadaun hotu-hotu iha direitu atu halao tratamentune’ebe mak diak, tanba ita nia Lei mos la tau iha ne’eba “penjara seuumur hidup”entaun sidadaun hotu-hotu mesmu ke nia sei iha kadeia hela hanesan prizioneira maibe kuandu doutor fo reseita ruma katak nia tenki halao tratamentu iha rai liur ita mos tenki kumpri nia mos halao tratamentu iha rai liur,”koalia deputadu Mateus.

Tuir deputadu nee katak, husi tratamentu medika eis Ministra Justisa ne’e iha rai liur ne’e loke dalan ba prizioneirus sira seluk ne’ebe mak moras bele halao mos tratamentu mediku iha rai liur kuandu persiza.

“Se nia ba uluk tiha loke hela dalan ba priozioneiru sira seluk, kuandu aban bain rua prizioneiru sira seluk moras mos sira bele ejiji ona tanba iha esperensia ne’ebe mak Sra. Eis Ministra ne’e loke dalan ona para sira seluk bele ba,”haktuir deputadu Mateus.

Entretantu Prezidenti Komisaun F Parlamentu Nasional trata ba asuntu saude, edukasaun, kultura, veteranus e igualdade jeneru, deputadu Virgilho da Costa Hornai komenta diak liu especialista husi rai liur mai fo tratamentu ba prizioneira Lucia Lobato iha Timor.

‘Hau hanoin diak liu especialista mai halo deit tratamentu iha ne’e, mais dehan situasaun ruma grave liu ita mos hanoin katak tenki ba halo tratamentu ba iha rai liur,”haktuir Virgilho.

Tuir deputadu bankada PD ne’e katak, sekuandu parte kompetenti autoriza eis ministra ne’e halao tratamentu mediku iha rai liur ne’e tuir nia ladun justu, tanba durante ne’e ema ne’ebe ho status bai-bain la hetan tratamentu especial.

“Tratamentu ne’e ladun justu karik tanba povu bai-bain ladun hetan asesu hanesan ne’e mas prizioneiru ne’ebe ke ho nia estautu seluk ida bele hetan fali tratamentu hanesna ne’e hau hanoin ladun iha igualdade ba tratamentu ida,”koalia Virgilho. JNDiario