PR Taur Husu RENETIL Kontinua Liberta Povu

PR Taur Husu RENETIL Kontinua Liberta Povu

Prezidente da Republika (PR), Taur Matan Ruak, husu ba membru organizasaun Rezistensia Nasional Estudante Timor Leste (RENETIL) atu kontinua halibur malu no servisu nafatin hodi liberta povu husi kiak no mukit.

“Funsaun RENETIL nian ne’ebe maka Sr. Prezidente rasik maka afirma seidauk hotu sei presiza kontinua halibur malu iha organizasaun ida ne’e nia laran atu hetan anspirasaun hodi bele kontinua ho libertasaun do povu tuir ida-idak nia nia knar,”haktuir membro Konselhu Comite Central RENETIL, Juaquim da Fonseca ho naran koñesidu iha funu laran “Rusu” ba jornalista sira iha Palacio Prezidensial Aitarak Laran Dili, Kinta (23/5).

Liu husi apelu ne’e, Juaquim da Fonseca, hateten, organizasaun RENETIL ne’e uluk iha funu hodi liberta Patria no agora iha tempu ukun rasik an organizasaun ne’e sei buka atu liberta mos povu husi kiak no mukit.

Tamba ne’e nia hateten tan, iha liñas jerais organizasaun RENETIL nian iha pontu ida koalia konaba prepara profisionais sira ho konsiensia revolusionario atu kontribui ba prosesu rekontrusaun nasional Timor Leste nian liu husi profisionais sira ne’ebe maka namkari iha Timor laran tomak ne’ebe maka oras ne’e dadauk seirvisu iha instituisaun estadu nian, setor privado no Organizasaun Não Governamental (ONG)

“Ami koalia uluk wainhira iha funu laran, ema sira profisionais sira ne’e agora dadauk ne’e lekar iha fatin bar-barak, iha Instituisoens Estadu nian, seitor privado, ONG oi-oin deit,”dehan Rusu ne’ebe maka uluk iha tempu okupasaun Indonesia hala’o knar iha RENETIL hanesan Secretario ba Dirasaun Jeral RENETIL nian.

Husi espasu ne’e maka RENETIL koko atu kontinua fo nia kontribuisaun ba prosesu dezenvolvimentu ka prosesu libertasaun povu husi kiak no mukit.

Durante enkontru ho Grupo RENETIL, Xefi Estadu hato’o mos nia preokupasaun ba prosesu dezenvolvimentu ne’ebe maka oras ne’e dadauk iha. Hanesan, preokupasaun konaba seksaun manajementu no dezafiu sira ne’ebe maka relasiona ho funsionamentu funsaun publiku nian.

“Prezidente fahe ho ami konaba nia preokupasoens ba prosesu dezenvolvimentu nian liu-liu nia subliña seksaun manajementu ba prosesu dezenvolvimentu i depois nia subliña dezafiu sira ne’ebe relasiona ho funsionamentu funsaun publiku nian,”dehan nia.

Konvida Partisipa Iha Kongresu

Aliende ne’e mos organizasaun Rezistensia RENETIL konvida Prezidente da Republika (PR) Taur Matan Ruak hodi partisipa no fo nia diskursu iha kongresu RENETIL nian ba dala 6 ne’ebe maka sei hala’o iha loron 18 de Jullu no sei termina iha loron 20 Lullu tinan ida ne’e.

Kongresu organizasaun rezistensia RENETIL ba dala 6 no kompleta mos ejistensia organizasaun ne’e nian ba tinan 25 ne’ebe maka monu iha loron 20 de Jullu tinan ida ne’e.

Membro Konsellu Comite Central RENETIL, Juaquim da Fonseca mos hateten katak, durante kongresu ne’e sei aprezenta reazustamentu ba estratejia hodi nune’e kontinua iha kompatibilidade ho dezafius no honestidades dezenvolvimentu ka iha prosesu formasaun Estadu ne’ebe maka oras ne’e dadauk iha.

“Cede RENETIL iha Dili, Farol tamba ne’e kongresu RNETIL nian sei hala’o iha Dili maibe fatin seidauk determina,”dehan Joaquim.JNDiario