PM Xanana Husu Igreja Tau Matan Ba Povu

Haklaken lai fuan diak, hanorin ukun fuan hadomi malu, hadomi natureza no hadomi nia Na’i liu sasan hotu-hotu, ne’e sai papél importante no prioridade Igreja nian, hodi hanorin ba nia emar sira.

Maibé dala wa’in, ita ema ne’ebé mak rona no hatene uma kreda ninia hanorin sira ne’e mak, tau sés tiha ba kotuk no lakohi halo tuir.

Ho ida ne’e Primeiru Ministru Kay Rala Xanana Gusmão kontinua enkoraja Igreja Katólika atu asume nafatin ninia papél edukador no motivador hodi eduka no motiva povu tomak iha rai doben Timor Leste (TL), hodi kria no hatene hadomi malu.

“Ha’u husu ba parte igreja atu tau matan nafatin ba povu, hanorin sira atu sira bele hatene ona hadomi malu, ita tenki hadomi rai ida ne’e  ho ita nia konsénsia, tanba rai ida ne’e la’os ema seluk nian,” apela Primeiru Ministru (PM) Kay Rala Xanana Gusmão foin lalais ne’e, wainhira lidera diálogu divulgasaun planu no programa desentralizasaun podér lokál ba iha salaun Paroquia igreja Santo António Manatuto.

Tuir Xanana, igreja asume papél importante atu hakbesik-an bei-beik ba povu no motiva sira ba moris diak.

“Ha’u husu ba igreja labele do’ok husi sarani (povu) tanba ita bo’ot sira nia papél importante tebes atu fó moral ba povu sira,”dehan Xanana.

Nia hatutan katak, amu lulik no madre sira mak durante ne’e sempre akompaiña povu tanba ne’e tenki kontinua fó  morál ba povu.

Xanana haktuir katak, Governu dala barak laiha posiblidade atu tun to’o baze hodi koalia ho povu. Tanba ne’e governu iha obrigasaun atu husu nafain ba igreja atu kontinua besik ho povu.

Alénde ne’e Padre Paroquia Santo António Manatuto, Benediktus Randum akresenta katak, papél igreja nian sempre la’o nafatin, liu-liu atu hanorin povu kona-ba oinsa mak atu hadomi malu no hadomi sira nia rain rasik.

“Padre no madre sira sempre hala’o sira nia misaun nu’udar bibi atan para tau matan ba bibi sira ne’ebé namkari. Maibé dala barak bibi sira mak la’o sala dalan no balun monu ba rai kuak,” Amo Benediktus Randam koalia.

Padre Benediktus Randam koalia katak, nu’udar Cristo nia liman ain, padre sira kumpri nafatin sira nia dever atu haklaken morál ne’ebé diak liu husi homilia iha misa domin.

Amo Pároco ne’e akresenta katak, orgullu tebes ho sarani Manatuto oan sira, tanba sira barak mak komesa ona hado’ok-an husi violénsia no sira barak mak hakarak kontribui ba dezenvolvimentu rai ida ne’e nian.

“Igreja Katólika mos husu ba governu atu akompaiña nafatin igreja hodi tau matan lisuk ba povu iha nasaun ida ne’e, hodi liberta povu ne’ebé to’o ohin loron mak sei moris iha liña pobreza”, dehan Amo Pároco Manatuto ne’e.JNDiario