PM Xanana: “Krize 2006 Problema Sosiál”

Primeiru Ministru Kay Rala Xanana Gusmão hateten katak, krize polítika ne’ebé mosu iha tinan 2006 liu ba ne’e, tanba problema sosiál, la’os Polisia Nasional Timor Leste (PNTL) ho Falintil Forsa Defeza Timor Leste (F-FDTL) maka sai autór.

Primeiru Ministru Xanana Gusmão kasu lia hirak ne’e bainhira hala’o divulgasaun munisipiu  fazé primeiru iha parte Leste, Distritu Viqueque, Segunda(14/05).

 “Desizaun ita foti no halo hanesan meius ida atu rezolve problema ne’ebé ke mosu iha ita nia rain, ema balun dehan autór prinsipal maka F-FDTL ho PNTL, maibé ita analiza didi’ak ida ne’e problema soisiál, tanba benefísiu husi ukun-an povu la sente”, hateten Xanana Gusmão.

Ho ida ne’e Xefi Governu husu ba ema hotu-hotu, atu halakon tiha kultura hanoin aat ida ne’e ba instituisaun estadu nian, PNTL no F-FDTL.

“La’os  FDTL ho PNTL mak  sai autór ba krize 2006,  tanba ne’e mak presiza halakon tiha kultura aat sira ne’e’’, Xefi Governu ne’e hateten ba povu Viqueque.”

Tuir Xanana, desde 2002-2012, Orsamentu Jeral Estadu sei gasta tuir nesesidades, maibé balun ne’ebé uza laduun di’ak, husu ba ida-idak nia-an rasik.

Xanana mós husu ba povu tomak iha Distritu Viqueque, atu muda kultura no hanoin aat sira hodi muda mentalidade ba hasoru Câmara Município.

Xanana mos realsa katak, tempu agora la’os buka direitu de’it, maibé tenki mós dever, sé la’e susar atu halo buat foun.

Xefe Governu relebra katak, povu mak hari’i estadu, liu husi fakar-ran ba mate, no tama ba faze ukun rasik-an atu dezenvolve povu nia moris, ne’ebé maka mensiona iha moto 2013 nian katak “Hadia Uluk Uma Laran’’.

Xanana mos esplika tan katak, presiza halo tan revolusaun hodi muda ema hotu nia mentalidade hodi bele kontribui ba proseu dezentralizasaun ne’ebé la’o dadaun.

“Sé-sé de’it, sé sé deiiiiit, bainhira 2002 kaer, maibé 2007 la konsege evita liu husi manifestasaun oi-oin, ita susar, ita lori hela kuda ida krekas ida ne’e, ita laiha bé ida atu fó hemu, tanba ita laiha kuadru legál’’ Xanana dehan.JNDiario