Funsionariu RTTL 14 Komete Korupsaun

Parlamentu Nasional (PN) hakfodak funsionariu Radio Televizaun Timor Leste (RTTL) nain 14 komete iha kazu korupsaun ne’ebe mak Comisaun Anti Korupsaun (CAC)  fo sai liu husi relatoriu anual iha Parlamentu Nasional (PN) semana foin lalais ne’e.

Husi relatoriu anual ne’e hatudu RTTL iha numeru as komete korupsaun as liu entre instituisaun Estado sira seluk no funsionariu naun publiku ne’e PN sai hakfodak ho kazu ne’ebe refere.

“Ami mos hakfodak rona husi relatoriu Comisaun Anti Corupsaun (CAC) iha instituisaun RTTL ninia arguidu nain 14 kedas ne’e hakfodak e,”deklara primeiru vice Parlamentu Nasional deputadu, Adriano do Nascimento, ba Jornalista sira Kinta (16/05) iha Parlamentu Nasional hodi komenta relatoriu anual CAC ne’ebe  mak aprezenta mai PN foin lalais ne’e instituisaun RTTL komete korupsaun as kompara instituisaun Estado sira seluk. 

Maibe nia dehan, prosesu CAC klasifika ona katak arguidu nain 14, maibe ho esperansa Ministeriu Publiku (MP) bele hare didiak para depois tribunal bele hare.

Nia dehan ba prosesu ne’e rasik komisariu la fo sai detalho, tanba konsidera segredu justisa nune’e entrega ba Ministeriu Publiku (MP) mak halo investigasaun klean.

“Ministeriu publiku tenki hare didiak tanba CAC nia razaun mak ne’e horseik hateten investigasaun hotu intrega ba ministeriu publiku sei halo investigasaun klean,”haktuir Adriano.

Membru komisaun A Parlamentu Nasional, trata ba asuntu Konstitusionais, Justisa administrasaun, poder lokal e anti korupsaun, deputadu Adriano do Nacsimento afirma, senti triste involvimentu RTTL iha kazu korupsaun ne’e, tanba Estado mos hasai osan lubun investe ba area rekursus humanus.

“Estado lakon halo investimentu ba dezenvolvimentu rekursus humanus lubun hira ona, tristeza bo’ot ida tan deit hakarak bo’ot liu buat ne’e sai hanesan ne’e,”dehan nia.

Maibe deputadu bankada PD, Adriano konfesa katak, seidauk bele dehan sala ka lae, tanba prosesu investigasaun sei lao hela, entertantu PN sei la intervens kazu refere, tanba ne’e kompetensia CAC, MP, Polisia no tribunal ninia servisu.

Iha fatin hanesna deputadu bankada FREILIN, Inacio Freitas Moreira komenta, senti preokupa no hakfodak instituisaun RTTL ninia kazu ne’ebe tuir tabele CAC as liu.

“Tabela ne’ebe mak CAC fo sai barak liu mak arguidu mane ho feto barak liu mak husi instituisaun RTTL halo hau mos hanesan hakfodak, RTTL afinal das kontas iha maun alin sira lubuk ida servisu iha ne’eba ne’ebe lolos tenke defende koalia buat ne’ebe lalos kuandu iha ona mal administrasaun dehan korupsaun lalos, maibe por kontrariu ita nia maun alin sira ne’ebe servisu iha RTTL maka  CAC investiga hetan arguidu 14,”deklara deputadu Inacio.

Ba kazu krime ne’e husu atu instituisaun RTTL mos hare ho seriu, tanbasekuandu iha investihasaun faktus forti RTTL komete iha korupsaun ne’e imajen at ba RTTL rasik no publiku.

“Husu instituisaun RTTL persiza tenki haree ho seriu, tenki toma atensaun oinsa sira bele hadia, tanba agora sei halo hela investigasaun maibe CAC enkaminha ba iha Ministeriu Publiku hafoin halo prosesu judicial ne’e ikus  mai iha maun alin ruma husi RTTL maka sai hanesna akuzadu e depois nu fim dehan sala ne’e hau hare hanesan imajen RTTL ninian bele ladiak i ida ne’e ita lamenta,”koalia deputadu Inacio. JNDiario