PM Xanana, TL Seidauk Ukun-An

Iha eventu Divulgasaun Planu no Programa Desentralizasaun Câmara Município, ne’ebé mak hala’o iha distritu Baucau, Primeiru Ministru (PM) Kay Rala Xanana Gusmão mós, realidade povu nia moris ne’ebé mak durante ne’e akontese iha baze.

Primeiru Ministru Xanana Gusmão mensiona katak, Timor Leste (TL) seidauk ukun-an loloos, tanba tinan sanulu resin ida ona TL independensia, maibé povu sei kontinua sofre no mate iha área rurais.

Tuir Xanana Gusmão, situansaun ida ne’e akontese, tanba matenek nain Timoroan sira hotu lahamutuk, hodi  liberta rai no povu ida ne’e husi terus ida ne’e, maibé sira preokupa deit ho sira nia interese privadu.

“Ita seidauk ukun-an loloos, tanba ami sira ne’e moris diak ona, hetan kareta vidru metan, halai iha komunidade sira nia let, rai rahun sa’e, povu nia oan sira han rai rahun no moras, maibé telefone ba ambulánsia atu tula ba hospital, mina laiha,”hateten Xefi Governu Kay Rala Xanana Gusmão, iha Estadiun Villa Nova Baucau, Sábadu (19/5), wainhira hato’o informasaun kona-ba Divulgasaun Planu no Programa Desentralizasaun Câmara Município.

Xanana Gusmão hatutan katak, povu to’o agora sei sofre no mate nafatin, tanba administrasaun no jestaun rai ida ne’e mak sei fraku.

“Funsionáriu sira mós barak mak malandru, dala barak sira lahatene saida mak importante duni atu sira hala’o, no saida mak sira atu halo iha sira nia servisu fatin lor-loron”, Xanana realsa.

Tanba ne’e, katak Xanana Gusmão, Município ida ne’e atu fó valor ba povu nia terus no nia sakrifísiu ne’ebé povu sofre durante tinan 24 nia laran.

Xanana dehan tan, Timoroan hot-hotu atu buka kna’ar ne’ebé los, atu hadia buat hotu hodi valoriza povu ida ne’e ninia sofrimentu.

Xefi Governu ne’e mós akresenta katak, setór privadu no intelektuais Baucau oan sira atu prepara-an didiak ona antes Município tama iha distritu ne’ebé mak koñesidu ho naran sidade ‘Kuligisa’ ne’e.

Lider rezisténsia ne’e mós enkoraja, autoridade lokál sira atu komesa book-an, fahe informasaun ba povu, kona-ba objetivu husi município ne’e rasik, atu nune’e povu mós bele komprende.

“Ha’u lakohi rona iha Distritu ne’e atu fahe malu, atu partidu polítiku, veteranus ou juventudi, imi hotu tenki hamutuk ho hanoin ida deit ba município ida ne’e,”Xanana husik hela lia menon.JNDiario